Bali CJITL, Vou Merpati AirLines loron 3 ona, hahu husi Quarta feira to'o Sexta feira ne'e la halo operasaun hanesan bain bain tanba aviao ne'ebe bain bain semo ba Dili ne'e at ho situasaun Grave, pior liu tan pasajeirus sira triste ho atetude Crew Merpati ne'ebe bosok pasajeirus durante loron rua tomak iha Aeroportu Ngurah Rai, Bali, Indonesia.

Provedor dos Direitos Humanos e Justica - PDHJ, Sebastiao Dias Ximenes, Prezidente Komisariu KAK, Aderito de Jesus Soares, Julio Gil da Silva Guterres, Fundador CJITL, Sekretariu Jeral PSD, hamutuk ho pasajeirus seluk kuaze loron rua resin ona la hetan informasaun klaru husi Merpati konaba desizaun ikus bainhira mak atu semo ba Dili.

Sebastiao Dias Ximenes, PDHJ ne'ebe tuir lolos tenki to'o ona iha Timor Leste atu realiza enkontro lubuk ida iha Dili, lamenta tebes hahalok husi Merpati liu – liu tenta atu bosok pasajeirus sira.

“Tansa sira la hateten klaru deit katak, Aviao at, tansa tenki bosok fali katak aviao sei semo ba fatin seluk, sira hanoin ita ne'e se, ita la'os animal” Sebastiao Dias hateten.

 
"Estado tenki firmi hodi fo kriteria ne'ebe adekuado ba Merpati, se Merpati lakohi halo tuir, hapara tiha Merpati, tanba tinan 10 ona sira nia vou la diak no pasajeirus sira sempre lamenta hela deit" Dias hatutan.
 
Nune'e mos Aderito de Jesus, hafoin fila husi reuniaun ho Komisi Pemberantasan Korupsi – KPK, iha Jakarta mos lamenta tebes ho situasaun ne'e.

“Ita nia estado tenki hare kaju ne;e, sira tenki bolu Merpati ba Parlamentu Nasional atu hatene lolos oinsa Merpati nia operasaun iha Dili, se lae ne'e sei estraga ema barak nia vida.

Crew Merpati loron rua ona bosok tun sa'e pasajeirus sira, tanba lakohi hateten sai ba pasajeirus sira katak aviao ne'ebe durante ne'e halo operasaun ba Dili iha kondisaun ne'ebe grave tebes.

Tuir informasaun ikus ne'ebe Merpati hato'o katak, hahu Sexta feira ne'e pasajeirus merpati nian hotu sei transfere ba aviao Batavia Air tanba Merpati nia aviao kontinua iha kondisaun ne'ebe labele hadia alias KERUSAKAN BERAT.

Ho Merpati nia bosok ten ne;e, pasajeirus sira ne'ebe iha hela Bali, atu husu ba Timor oan tomak ne'ebe atu ba rai liur karik, tenki konfirma halo didiak, aviao nia kondisaun molok sa'e merpati tanba bele estraga ema barak nia vida. (Domingos da Silva/CJITL)