CJITL Malaysia, Lia Syed, Direitor Executivu MSRI ou Malaysian Social Research Institute konfirma katak planu Australia atu hari sentru prosesamentu refujiadu iha Timor Leste ne'e la iha lojika no nia kontra makas hodi hateten katak ne'e kontra lei internasional ba direitos humanos nian.

Asuntu ne'e sai tiha ona kestaun nasional iha fulan kotuk, hafoin governu Australia fulan rua liu ba aprezenta planu ba estado Timor Leste atu hari sentru prosesamentu refujiadu iha Timor Leste, maske Parlamentu Nasional rejeita ona opsaun ne'e maibe oras ne'e dadaun estado liu husi Prezidente Republika, Jose Ramos Horta seidauk to'o iha finalidade ida hodi deside katak labele hari sentru refere.

Liu husi intervista exlusivu ho Gil da Silva, CJITL online iha nia servisu fatin iha Jalan U Thant, Kuala Lumpur, Malaysia, Kuarta feira ne'e (29/6) nia hateten katak do'ok tebes atu hari sentru prosesamentu iha Timor Leste.

“Australia sempre hateten katak, refujiadu hotu hotu hakarak tama ba sira nia nasaun, no hakarak hari sentru prosesamentu ou sentru detensaun ida iha Timor Leste, ne'e la lojika tanba laiha baze fundamentu ida, hau nia objeksaun mak ne'e tanba sa tenki Timor Leste no tempu detensaun ou prosesamentu ne'e to'o tinan hira” Lia hateten iha intervista ne'e.

“Hau kontra ideia ne'e, no mai ita hamutuk hateten lae ba Australia tanba ne'e kontra prinsipiu direitos humanos no hau apoiu imi nia desizaun husi parlamentu ne'ebe deside ona atu lakohi fo fatin fa hari sentru prosesamentu ne'e” Lia hatutan iha interview ne'ebe halo durante minutu 30 ne'e.

“If it is for 6 months okeyLAH, my prime objection is the time limit” Direitora ne'e hatutan.

Lia Syed nu'udar feto aktivista palestiniana ida ne'ebe servisu tiha ona ba area refujiado nian durante tinan 30 iha Malaysia.

Iha Malaysia, Lia nia instituisaun MSRI hari sentru refujiado nian ida hodi tau matan ba refujiado sira ne'ebe mai husi nasaun sira hanesan Palestina, Sri Langka, Irakia no Afganistaun nian.

Iha Malaysia iha hamutuk regujiadu na'in 94.000 ne'ebe rejistadu husi nasaun oin – oin no husi numero ne'e 90 % mai husi Myanmar ou Burma hafoin lideransa demoktratiku Aung San Suu Kyi   monu iha tinan 1988.

Iha Malaysia, maske refujiado sira hela tiha ona tinan rua nulu resin iha Malaysia maibe sei kontinua hela ho statuto hanesan refujiado no sira nia nasaun rasik la rekonhece ona sira hanesan sidadaun ida, no malaysia, refujiado sira ne'e rasik la hetan cidadania malaysia ou bilhete identidade. (CJITL Malaysia/Gil da Silva)