CJITL Malaysia, Hafoin hetan detensaun durante oras balun, Sabdu ohin (9 Julho), demonstrantes besik nain rihun ida (1000) ne'ebe kaptura ohin, hahu liberta hikas dadaun tuku 06.30 loraik ne'e.

Tuir publikasaun Malaysiakini ne'e kuota steitmentu husi Chefe polisia KL CID, KU Chin Wah, katak demonstrante hotu hotu ne'ebe kapturado ohin sei liberta hikas molok tuku 09.00 kalan oras Malaysia nian.

Libertasaun ne'e inklui mos Ambiga Sreenevasan, Chefe BERSIH 2.0 ne'ebe kaptura iha tuku 03.00  loraik ohin.

Demonstrasaun BERSIH 2.0 ne'be hahu ohin dader konsege halo sidade kuala lumpur nakonu ho gas lagrimogenio (Gas Air Mata) ne'ebe polisia hahu tiru iha tuku 11.00 ohin.

Tuir publikasaun oficial husi Twitter BERSIH 2.0 katak husi demonstrasaun ohin rejulta demonstrante ida mak mate, ho naran Baharuddin Bin Ahmad tanba hetan asma bainhira halai ses husi kapturasaun polisia nian.

Iha publikasaun oin – oin hatudu katak demonstrasaun ne'e sei kontinua iha loron aban, tanba ejijensia ou petisaun ne'ebe demonstrante hato'o seidauk hetan resposta tuir sira nia hakarak. (Gil da Silva/CJITL Malaysia)

 

Noticia Antes:

Live Update: A Samad Ne'ebe Lidera Demonstrasaun BERSIH 2.0

Reportajen Gil da Silva, Kuala Lumpur, Malaysia

CJITL Malaysia, A Samad, Maske katuas ona, maibe nia mak hamrik iha oin hamutuk ho demonstrante nain 10.000 resin, sabdu ohin

iha Kuala Lumpur atu halo petisaun ualo (8) ba governu, maske to'o tuku 04.30 loraik ne'e, nia delegasaun seidauk konsege hato'o petisaun ba governu iha Istana Merdeka.

Delegasaun n'eebe hamutuk na'in 20 ne'e, hapara tiha husi polisia iha Istana Merdeka nia oin ou metru atus rua (200) deit husi palasio governu nian, fatin ne'ebe sira atu hato'o petisaun nian.

Maske besik ona demonstrante nain 700 inklui top leader demonstrasaun nain 10 resin mak polisia kaptura ona, maibe A Samad kontinua hamrik iha oin hatais kamizola kinur hodi husu ba autoridade polisia atu fo lisensa ba nia ho nia grupo atu hato'o petisaun 8 konaba eleisaun ne;ebe livre no justu.

Negosisaun ho polisia hala'o hela maibe to'o artigu ne'e hatun polisia kontinua la fo fatin ba nia delegasaun atu halo petisaun formal.

“Hau Presiza deskansa oitoan” nia hateten ba jornalista hafoin negosiasaun ne;e laiha rezultado.

Demonstrasaun bo'ot kontinua la'o iha sidade Kuala Lumpur, seidauk hatene mos futuro husi demonstrante nain 672 ne'ebe polisia kaptura ona.

Iha fatin ne'ebe la hanesan, iha Pasar Seni, China Town, Kuala Lumpur, demonstrantes sira kontinua hetan atake tiru gas mata ben nian no water canon husi oficias polisia ne'ebe hakanek mos demonstrantes barak. (Gil da Silva/CJITL)

 

Noticia Antes:

Live Update: Eis Vice PM Malaysia Hetan Tiru, Demonstrante 672 Kapturado

Reportajen Gil da Silva, Kuala Lumpur, Malaysia

CJITL Malaysia, Demonstrasaun BERSIH 2.0 n'eebe hala;o loron ohin kontinua dezmobilizado hafoin polisia Malaysia halo tiru gas lagrimonia hodi rezulta demonstrante nain 672 hetan kapturado inklui Eis Vice Primeiru Ministru Anwar Ibrahim ne'ebe mos hetan kanek oitoan iha nia oin husi atake ne'ebe polsia halo ba nia oin iha KL Sentral.

Tuir reportajen, to'o tuku 2.30 loraik ne'e demonstrante na;in 672 ona mak kapturado inklui mos Anwar Ibrahim nia oan feto nai rua Nurul Izzah no Nurul Hana.

Tuir Chefe BERSIH 2.0, Ambiga Sreenevasan ne'ebe organiza demonstrasaun ne'e ba jornalista sira konfirma katak nia mos hetan kapturasaun ona husi polisia. (Gil da Silva/CJITL Malaysia)

 

Noticia Antes:

 Demonstrante Na'in 10.000 resin nakonu iha Sentral Kuala Lumpur, Nain 514 Kapturado

Reportajen Gil da Silva, Kuala Lumpur, Malaysia

CJITL Malaysia, Demonstrasaun bo'ot husi grupo BERSIH 2.0 kontinua sai bo'ot hafoin demonstrante nain 10.000 resin ne'ebe halibur malu husi fatin oin – oin iha kapital Kuala Lumpur, Malaysia kontinua hakat ba oin atu ba Stadiun Merdeka atu hato'o sira nia ejijensia konaba prosesu eleisaun ne'ebe livre no justu.

Gas Lagrimoniu no water canon ne'ebe Polisia Malaysia tiru hasoru demonstrantes sira iha dalan dalan hanesan iha Masjid Jameek, Petaling Street no fatin oin – oin tan iha Kuala Lumpur lakonsege hapara demonstrante sira maske tuir reportajen ketak husi media oin oin hatudu ema nain 514 resin ona mak kapturado.

To'o artigu ne'e publika, reporter CJITL online iha Malaysia, Gil da Silva kontinua monitoriza aktividade demonstrasaun ne'e.

Gil da Silva iha Malaysia hahu kedan iha loron 24 Junho hodi hola parte iha SEAPA fellowship. SEAPA katak South Eastasia Press Alliance. (Gil da Silva/CJITL Malaysia)

Noticia antes;

Live Update: Polisia Komesa Uja Gas Air Mata, Demonstrante na'in 443 Kapturado

CJITL Exlusivu, Demonstrasaun BERSIH 2.0 iha Kuala Lumpur, Malaysia komesa nakfera, hafoin Autoridade Polisia Malaysia nian hahu uja Gas Air Mata ou  Gás lacrimogêneo hodi hafafe demonstrante sira ne'ebe mosu husi fatin fatin iha sidade Kuala Lumpur.

To'o tuku 13.30 ne'e polisia kaptura ona demonstrante nain 443 ne'ebe kompostu husi mane nain 423 no feto nain 20.

Maske nune'e demonstrante barak husi fatin fatin kontinua hakilar  'Bersih, Bersih, Pilihanraya' no  'Hidup, Hidup, Rakyat'.

Tuir observasaun direita CJITL husi Jalan Petaling, iha China Town, Kuala Lumpur, besik Stasiun LRT  Pasar Seni nian hatudu demonstrante rihun 3000 resin kaer liman metin nafatin hodi la'o tuir dalan hodi koko atu fera blokade ne'ebe polisia halo.

Jornalista lokal no internasional barak komesa fo atensaun ba demonstrasaun ne'e hafoin kapturasaun hala'o iha fatin fatin iha sidade Kuala Lumpur. (Gil da Silva husi Malaysia/CJITL)