CJITL Investigativu, Tuir mai ne'e CJITL online hakarak hatun kronolozia ida konaba oinsa aviao merpati airlines bosok nia pasajeirus sira iha Bali, Indonesia bainhira aviao ne'e la halo operasaun mai Dili durante loron 2 hahu husi loron 20 – 22 Julho 2011.

Loron 20 Julho Hahu husi tuku 07.00 – 09.30 dader oras Bali,
Bainhira pasajeirus sira ne'ebe atu mai Dili, halo check – in, crew merpati iha aeroportu Ngurah Rai, Bali hateten katak ohin laiha operasaun ba Dili tanba aviao at, no pasajeirus sira hotu – hotu sei hela iha hotel Ramayana no Green Villa, akomodasaun loron tomak no toba kalan responsabilidade Merpati nian.

Loron 21 Julho Hahu husi tuku 07.30 dader oras Bali,
Bainhira pasajeirus sira ba aeroportu atu check – in, konsege hetan boarding pass maibe crew Merpati hateten katak aviao sei semo ba Dili iha oras 13.30 loraik oras Bali nian. Pasageirus hotu – hotu (loron rua nian) ba hein iha gate 9.

Loron 21 Julho Hahu husi tuku 13.30 Meiudia oras Bali,
Crew merpati lori hahan iha kaixa (nasi kotak) fahe ba pasajeirus sira no dehan fali katak aviao sei semo iha tuku 03.00 loraik fali, la'os tuku 13.30 tuir tempu ne'ebe sira promete iha tempu dader.

Loron 21 Julho Hahu husi tuku 03.00 loraik oras Bali,
Crew Merpati hateten ba pasajeirus sira katak hein minutu 30 tanba aviao seidauk landing (sei semo ba fatin seluk). Realidade hatudu katak Aviao at no para hela loron rua ona, maibe crew merpati bosok fali dehan aviao atu landing iha minutu 30 nia laran husi fatin seluk mak mai.

Loron 21 Julho Hahu husi tuku 03.30 loraik oras Bali,
Crew Merpati tanba tauk ona, enton haruka pasajeirus sira tama ba waiting room hodi hein aviao, iha ne'eba mak pasajeirus sira hare ho matan lolos katak aviao at ho kondisaun grave hahu kedan iha horseik (20 Julho).

Loron 21 Julho Hahu husi tuku 05.00 loraik oras Bali,
Crew merpati sira ta'uk lakohi fo hateten kondisaun lolos ba pasajeirus sira, nune'e Direitor CJITL, Julio Gil da Silva Guterres, tun hodi kbit ba sira nia fatin atu husu tuir konaba kondisaun pasajeirus sira nian ne'ebe la hetan atensaun husi merpati. Liu tiha minutu 5, crew merpati sira sa'e mai leten hodi esplika no anunsia ba pasajeirus sira katak ohin aviao labele semo tanba la konsege hadi'a.

Loron 21 Julho Hahu husi tuku 5.30 Loraik oras Bali,
Crew Merpati  promete ba pasajeirus sira katak aban dader aviao semo tuku 06.00 ou 07.00 dader deit, hafoin koalia tiha nunee crew merpati nian tula pasajeirus hotu – hotu ba iha Nusa Dua, iha hotel GOODWAY no balun ba GREEN VILLA hotel. akomodasaun kalan tomak responsabiliza merpati nian.

Loron 22 Julho Hahu husi tuku 07.00 dader oras Bali,
Crew merpati fo informasaun katak tuku 09.00 mak mai tula pasajeirus sira husi hotel ba aeroporto, maibe to'o tuku 09.00 merpati la mosu. Hafoin ne'e Gil da Silva telefone ba Merpati no sira fo informasaun katak tuku 12.00 meiudia mak Merpati mai tula, tanba pasajeirus sira ohin bele ona fila ba Timor maibe uja aviao BATAVIA AIR.

Loron 22 Julho Hahu husi tuku 12.00 Meiudia oras Bali,
Crew merpati tula pasajeirus husi hotel ba aeorportu. Iha ne'eba pasajeirus sira la hetan hahan durante oras tolu nia laran. Provedor Direitos Humanos e Justica, Sebastiao Dias Ximenes ne'ebe mos hola parte iha grupo pasajeiru ne'e tenkiser sosa biskuit hodi han tanba oin halai iha aeroportu laran.

Loron 22 Julho Hahu husi tuku 15. 05 Meiudia oras Bali,
Pasajeirus sira boarding ba iha waiting room, ne'ebe prontu atu semo ho aviao Batavia Air.

Loron 22 Julho Hahu husi tuku 15.50 Meiudia oras Bali,
Pasajeirus sira fila mai Timor Leste ho aviao Batavia Air Bus 320 to'o iha Dili besik tuku 07.00 kalan.

Kronolojia ne'e hakerek husi Julio Gil da Silva Guterres, SEAPA Fellow 2011.