CJITL inDepth, Iha loron 26 Maiu 2011, semana kotuk, Tribunál Distritál Dili julga kazu krime graves ne’ebé akontese iha tinan 1999 depois de Referendu ho Nú. 13/C.Ord/2011.

Julgamentu ne’e rasik dirije husi juizes kolektivu ne’ebé kompostu husi Juiz João Felgar (Juiz Internasionál) Rosa Brandão (Juiza Internasionál) no Deolindo dos Santos (Juiz Nasionál), no Ministériu Públiku reprezenta husi Franklin A. Furtado (Prokuradór Internasionál) no arguidu rasik hetan defeza husi José da Silva, husi Eskritóriu Defensoria Públiku.

Julgamentu ba membru milisia Besi Merah Putih (BMP) ho inisiál VL ne’e loloos hala’ó mós ba membru seluk ho inisial AdJ, ne’ebé nu’udar VL nia komandante iha momentu ne’ebá.

Maibé tanbá arguidu AdJ to’o oras ne’e seidauk fila hikas husi Indonézia, Ministériu Públiku no Defensor husi arguidu husu ba tribunál atu halo julgamentu separadu ba arguidu ida seluk wainhira nia fila hikas ona mai Timór Léste. Pedidu ne’e, bazeia ba artigu 25(c) Kódigu Prosesu Penál konabá separasau ba prosesu. Bazeia ba pedidu ne’e, julgamentu ba arguidu VL hala’ó nafatin tuir orariu ne’ebé Tribunál marka tiha ona.

Diretór ezekutivu JSMP Luis de Oliveira Sampaio deklara katak julgamentu ba kazu krime grave ne’ebé akontese iha tinan 1999 depoisde Referendu hanesan pasu ne’ebé refleta prinsípiu Konstituisionál ne’ebé defini iha Artigu 160 Konstituisaun ne’ebé ejije justisa ba krime sira iha tempu pasadu nian atu prosesa tuir Tribunál nasionál ka internasionál.

Tanbá ne’e, mesmu preokupa ho prosesu ne’e rasik nia lalaok iha aspeitu rekursu umanus no koñesimentu autór judisiáriu sira nia ba prosesu ne’e relasiona ho krime graves nian, maibe enkoraza ema hotu atu nafatin fo konfiansa ba Tribunál atu halo nia funsaun tuir lei no Konstituisaun haruka.

JSMP haksolok ho desizaun Tribunál Distritál Dili relasiona ho pedidu Ministériu Públiku nomós husi Defensor ne’ebé husu ba tribunál atu separa prosesu julgamentu bazeia ba artigu ne’ebé prevê iha artigu 25 (c) Kódigu Prosesu Penál, ne’ebé defini katak exesionalmente, bele haketak prosesu, ofisiozamente ka tuir rekerimentu kuandu bele hamósu atrazu sensivel ba prosesu.

Ba kazu refere, mesmu iha faktus barak ne’ebé hatudu involvimentu arguidu nu’udar membru aktivu BMP iha Distritu Liquica antes, durante no depoisde referendu, maibé Ministériu Públiku, akuza arguidu ho krime kontra humanidade, homisídiu konsumadu hasoru matebian Patriçio Sarmento Viegas iha loron 6 de Setembru 1999 iha tasi ibun Pala, Liquiça.

Tuir Ministériu Públiku, aktu ne’e konsidera hanesan parte ida hodi halo ataké generalizasaun sistemátiku kontra populasaun sivíl ho koñesimentu públiku. Hahalok ida ne’e kontra ona artigu 5. 1 (a) no 14 iha Regulamentu UNTAET No 15/2000.

Wainhira tribunál lê akuzasaun ba arguidu VL, ba ninia involvimentu durante periodu krize tinan 1999 nu’udar milisia BMP, arguidu halo rejeisaun totál ba akuzasaun ne’e tanbá iha ninia deklarasaun ba tribunál katak iha momentu ne’ebá nia ho nia família sira evakua ba iha Atambua (Indonézia) iha loron 6 de Setembru 1999 iha oras 10:00 dader.

Arguidu mós deklara katak nia la hatene tanbá sa mak halai husik hela nia rain ba Indonézia.

Tuir observasaun JSMP nian durante prosesu julgamentu, wainhira juiz no ministériu públiku husu perguntas ba arguidu ka halo cross check ba faktus relasionadu sira, arguidu hatan ho reazem makaas no manifesta atitude ne’ebé la hatudu respeitu ba Meritísimu juizes sira iha Tribunál.

Arguidu hatan ba perguntas hirak ne’ebé dirije ba nia hanesan arguidu no koko atu dezafia perguntas ba Meritísimu juizes sira. Ezemplu ida husi resposta arguidu nian ba juiz nia pergunta mak nia hatan ba Meritísimu juiz katak “sé o hatene ona nusa o husu fali mai hau?.

Hafoin rona tiha deklarasaun husi arguidu VL, tribunál deside hala’ó fila fali ka kontinua fali julgamentu ba membru BMP ne’e iha loron 2, 3, 6, no 7 de Juñu 2011 hodi rona fali depoimentus husi testemuñas sira ne’ebé hamutuk totál ema 42 bazeia ba informasaun ne’ebé mak JSMP konsegue kolekta.

JSMP hanoin katak importante teb-tebes ba entidade no parte hot-hotu, tantu individu ka koletivamente atu dignifika papél estratéjiku husi instituisaun judisiáriu sira iha kontestu prosesu dezemvolvimentu nasionál nian.
 
Partikularmente, JSMP hein katak orgaun soberania sira bele ezerse sira nia kbi’it konstituisionál tuir regra sira ne’ebé defini ona iha Konstituisaun. Kazu krime grave, krime kontra umanidade, jenosida nu’udar krime ne’ebé afeita dignidade umana, tanbá ne’e, ejije ba sosiedade hotu iha mundu rai-klaran atu hakribi krime hirak ne’e, liu husi, fó fatin no apoiu prosesu justisa to’o nia finalidade.

JSMP mós enkoraza arguidu atu respeita funsaun Tribunál nian, no husu ba arguidu atu kolabora ho prosesu, no karik sente la konfortavel atu koalia bele uza nia direitu fó ka la fó nia deklarasaun tuir saida mak defini iha letra (c), husi Artigu 60 Kódigu Prosesu Penál, duque halo reazem hasoru autoridade judisiáriu durante prosesu julgamentu nia laran. (*/CJITL)