Baucau inDepth, Atu antisipa na’ok ten aumenta ba bebeik halo movimentu iha tempu kalan, komunidade hamutuk ho autoridade Sub Distritu Queilecai deside aplika estadiu de sitiu durante kalan tomak hodi bandu populasaun labele la’o ba mai hahu tuku 6 kalan to’o dadersan.

Desizaun hodi implementa estadu de sitiu ne’e hetan konkordansia husi parte hotu hanesan komuindade, autoridade lokal no skuarda Polisia Nasional Timor Leste (PNTL) iha sub distritu Queilecai.

“Hare ba preoukupasaun populasaun sira iha sub distritu Quelicai hamutuk ho autoridade lokal to’o konselhu suku sira foti problemas ne’e atu preven aktu na’ok ten sira”, dehan Xefi aldeia Uidaba, Sentru Laisorulai, Felix Cabral, foin lalais ne’e iha Queilicai. “Ikus mai hasai konkluzaun katak  labele la’o iha tempu kalan, komesa husi tuku 6 kalan”.

Lideransa komunidade ne’e haktuir na’ok ten sira ne’e hahu iha Novembro tinan kotuk too ohin loron nafatin hala’o atividade iha tempu kalan hodi na’ok populasaun nia rikeza hanesan hahan, animal inklui rikeza uma adat nian (lulik).

Nia katak tan, kazu na’ok ten ne’e la’os deit foti sasan maiibe mos oho ema ka halakon ema nia vida hanesan akontesementu iha suku Letemumo, aldeia Osolia fulan kotuk maibe parte polisia rasik seidauk identifika supeitu sira.

Grupu na’ok ten sira ne’ebe halo movimentu iha tempu kalan ne’e maizumenus ema 10 ba leten.

Nia reafirma tan katak aplika estadu de sitiu ne’e hetan konkordansia husi parte hotu-hotu, la’os ema ida ka rua nia desizaun.

Prosesu estadu desitiu ne’e hetan suporta masimu husi komunidade tanba sira bele deskansa ho kontente iha tempu kalan.

“Sente kontente wainhira bandu atu la’o iha tempu kalan”, katak Maria Freitas, komunidade husi suku Lelalai, sub distirtu Queilicai, distritu Baucau. “Ne’e diak liu para ami mos bele deskanasa no halo seguransa ba ami nia bairo laran”.

komunidade ne’e haktuir durante ne’e hasai ona tara bandu liu husi adat atu ema labele la’o kalan maibe na’ok ten sira ne’e nafatin halo movimentu iha fatin balun hodi na’ok populasaun nia sasan no animal.

Iha biban seluk, Eis xefi  aldeia Sentru Laisorulai, Mariano Cabral ne’ebe hetan konfirmasaun husi CJITL katak estadu de sitiu ne’e aplika duni tanba na’ok ten barak mak mosu iha area ne’ebe refere. (CJITL Baucau/Pedro Ximenes)