CJITL Feto, Iha loron 31/05/2011 Tribunál Distritál Dili hala’ó audensia julgamantu ba kazu interrupsaun ba gravidés/abortus. Kazu ne’e rejistu ho numeru prosesu 140/C.Ord/TDD/2010, ne’ebé mak komete husi arguidu BPQ hasoru lezada ACDS ne’ebé nu’udar arguidu nia kaben rasik. Kazu refere akontese iha Suku Leidaha sub distritu Bazartete, distritu Liquisa.

Julgamentu ba kazu refere prezidi husi juiz koletivu ne’ebé kompostu husi; Duarte Tilman hanesan juiz prezidente,João Ribeiro no Jose Goncalves hanesan membru. Husi parte Ministériu Públiku reprezenta husi Oscar Tavares no husi parte defeza reprezenta husi Denis Laserda husi eskritoriu Defensoria Públika.

Iha komunikadu ne'ebe CJITL simu, Diretór JSMP Luis de Oliveira Sampaio haktuir katak” mesmu konkorda katak interrupasaun ba gravidés ho meiu saida deit konsidera hanesan krime ne’ebé grave tuir saida mak defini ona iha Artigu 141 Kódigu Penál, maibe JSMP preokupadu uitoan ho artigu ne’ebé Ministeriu Públik uza hodi akuza arguidu ba kazu ne’e.

Liu tan nia hatutan, mesmu respeitu nafatin opsaun Ministériu Públiku (MP) nian atu deside ka hili artigu ne’ebé merese liu ba kada kazu sira ne’ebé Ministériu Públiku kaer, maibe ba kazu ida ne’e, artigu ne’ebé Ministériu Públiku refere, bele kria problema ba Ministériu Públiku iha prosesu produsaun prova relasiona ho kestaun elementu kriminál.
 
JSMP fiar katak Ministériu Públiku sei infrenta dezafiu atu prova intensaun husi arguidu no meus ne’ebé nia uza.

JSMP hanoin katak, hare ba kronolojia akontesimentu kazu ne’e, hatudu katak arguidu la iha intensaun ka aktu ne’ebé nia halo la ho intensaun atu provoka fetu (janin) ne’ebé iha lezada nia isin abortu.
 
Tuir JSMP, abortu ne’e rezulta husi aktu mauz-tratus ka ofensa ba integridade fisika ne’ebé arguidu halo hasoru lezada. Tanbá ne’e, JSMP prefere atu uza Artigu 146 junta Artigu 154 Kódigu Penál.

Bázeia ba akuzasaun Ministériu Públiku nian ne’ebé mak lee husi juiz, haktuir katak iha loron 17/12/2010 iha Suku Leidaha, arguidu tebe dala-rua iha lezada nia kabun (momentu ne’eba lezada isin rua fulan hitu) no basa lezada to’o lezada dezmaia no monu ba rai.
 
Kauza husi asaun ne’e rezulta  hetan bubu iha nia oin no provoka fetus iha inan nia kabun laran abortu.
 
Liu tan Ministériu Públiku akuza mós arguidu tanbá durante sai fen ho laen, arguidu sempre halo maus tratus ba lezada.

JSMP observa katak, depois rona tiha deklarasaun husi arguidu ne’ebé mak konfesa nia hahalok tomak, rona mós depoimentu husi testemuña, iha alegasaun final, Ministériu Públiku alega deit arguidu ho krime interrupsaun ba gravidés ne’ebé mak define iha artigu 141(1) Kódigu Penál, tanbá alegasaun ba krime maus tratus ba konjuje, la provadu iha tribunál.

JSMP mós nota katak iha audensia julgamentu ida ne’e, lezada lakohi fo nia deklarasaun tanbá tribunál fo opsaun ba lezada hodi fo ka la fo nia deklarasaun bázeia ba artigu 125 Kódigu Prosesu Penál.
 
Maibe Ministériu Públiku la simu despaxu husi juiz no sei hato’o rekursu, tanbá Ministériu Públiku intende katak, bázeia ba artigu 118, lolos lezada iha obrigasaun atu fo nia deklarasaun ba tribunál.

Bázeia ba pedidu Ministériu Públiku tribunál deklara katak sei fo tempu ba Ministériu Públiku atu hato’ó rekursu hasoru despaixu ida ne’e, maibe julgamentu ba kazu refere kontinua hala’ó.

Audensia julgamentu hodi lee leitura akordaun sei hala’ó iha loron 15/06/2011, oras tuku 14.30 loro kraik. (*/CJITL)