CJITL Feto, Maria de Jesus ne'ebe hanesan vendedor roda tolu iha dalan ninin fiar an katak iha selebrasaun loron restaurasaun ne'e sira sei ra'ut osan barak tanba sidade laran sei nakonu ho ema, liu - liu iha palasio do governu.

Tuir Maria katak nia fa’an sasan iha estrada ninin ne’e bele ajuda nia ba eskola no bele ona hola buat ne’ebe mak nia persiza lori ba eskola.
 
Nia rasik hakarak servisu iha fatin ne’ebe mak diak maibe nia kapasidade mak sedauk to’o, nia mos hakarak kontinua nia eskola to’o Universidade.

Oan husi Cosme Maia no Fatima de jesus ne’e hateten katak ita ema moris tenke iha prinsipio ida katak buka mak sei hetan no husu mak sei fo, se kuandu ita la buka osan ita atu hetan osan halo nusa.

Rendimentu ne’ebe mak nia hetan loron ida U$ 15- 20 dollar, osan sira ne’e hodi hola fali sasan hodi fa’an fila fali, no osan balun hodi hola nesesidade lor-loron nian.

Maria mos fiar an katak iha loron bo'ot hanesan selebrasaun restaurasaun independensia 20 de Maiu ne'e nia bele hetan rendimentu makas liu tan, tanba ema barak mak sei sosa sira nia produto.

“Hau hakarak atu servisu iha fatin ne’ebe diak, maibe hau sente hau nia kapasidade sedauk to’o tanba ne’e hau hakarak kontinua hau nia eskola” informa Maria Kuarta 18/5, iha Tasi Ibun Lesidere Dili.

Nia mos husu ba governo atu labele bandu sira fa’an iha dalan ninin tamba ema balun eskola maibe sira mos kontinua fa’an sasan iha Estrada ninin.(Celestina & Cesaltina/CJITL Internhip)