CJITL Feto, Tuir mai ne'e redasaun CJITL online hatun relatoriu JSMP nia monitorizasaun  n'ebe hala'o durante fulan Maiu 2011 iha Tribubal Distrital Baucau konaba kaju violensia sexual.

Iha loron 4 -5 Maiu 2011, Tribunál Distritál Baucau hala’ó julgamentu ba kazu violasaun seksuál ne’ebé involve arguidu MX hasoru lezada AMX. Deskonfia akontese iha Afaca, Sub Distrítu Queliquai, Distrítu Baucau iha tinan 2008 (loron la konfirmadu).
 
Prosesu julgamentu ida ne’e taka ba públiku.

Maibé informasaun ne’ebé hetan husi parte tribunál, katak tinan 2008 (loron la klaru) tuku 24.00 kalan. Arguidu tama ba iha vítima nia uma momentu ne’ebá vítima nia la’én la iha uma tanbá ba servisu iha fatin seluk.
 
Arguidu ho ameasa obriga vítima halo relasaun seksuál. Tanbá ameasa maka vítima mós tauk no konsegue halo relasaun sexual ho arguidu iha momentu ne’ebá.

Testamuña ho inisiál Z hanesan mós oan husi vítima, liu husi nia depoimentu katak iha kalan akontesimentu testamuña hakfodak tanbá rona nia inan tanis, no harê duni mane ida halai sai husi uma maibé la klaru ema ne'e sé.
 
Liu tiha mais ou menus loron 10, la’én fila husi servisu no vítima hato’ó problema refere no sira ba keixa iha polísia.

Deklarasaun husi arguidu ba tribunál katak relasaun ne’e akontese tanbá hakarak ho hakarak, maibé deklarasaun vítima rasik deklara katak nia hetan ameasa.
 
Iha tempu balu, arguidu lakohi ko’alia ka hatan perguntas husi juiza ne’ebé halo juiza sai konfuzaun liu tan.
 
Ministériu Públiku akuza arguidu bázeia ba artigu 171 Kódigu Penál konabá Koasaun Seksuál ne’ebé hetan pena prizaun tinan 2 to’o 8.

Leitura akordaun ou desizaun atu hatama akujado ba kadeia se le sai iha loron 19 Maiu 2011, tuku 14.00 lorokraik. (*/CJITL)