Aktual Prezidente Klibur Oan Timor Aswai'n – KOTA deklara katak nia sei aprezenta nia kandidatura ba Tribunal Rekursu iha loron 30 Janeiru n'ee hanesan Independente ba eleisaun prezidensial.

Tuir Manuel Tilman intervista ida ho CJITL, Kuarta ne'e (25/1) hateten katak desizaun ne'e atu hakuak povu no garante unidade nasional la'os tamba problema n'eebe akontese iha partidu laran.

Partidu KOTA oras ne'e fahe ba rua hafoin, Cesar Augusto dos Santos Secretariu Jeral partidu hamutuk mos ho Pedro Ramalho, halo rejistu foun ba Tribunal Rekursu ho naran Asosisaun Popular Monarkia Timorense – APMT.

Iha Intervista ho Prezidente APMT, Pedro Ramalho, Kuarta (25/1) hateten katak oras ne'e dadaun KOTA la ejisti ona iha Timor Leste.

“Manuel Tilman, nia trai ona partidu no la halo relatoriu financial no nunka mai iha sede KOTA durante tinan ne'en (6) ona, tan ne'e KOTA muda hikas nia an ba APMT” Ramalho hateten iha Eis Sede KOTA nian, Kampo Alor, Dili.

“Partidu APMT moris iha loron 15 de Julho 1974, partido refere muda fali ba KOTA iha 10 de Novemru 1974 no agora dadaun muda hikas fali ba APMT iha loron 27 Dezembru 2011” Ramalho haktuir.

Hatan ba transformasaun ne'e Tilman hateten: Ahhh..hau koalia konaba KOTA, tamba ida ne”e maka interese mai hau atu hetan votus, hau ba koalia fali ba seluk atu manan saida nein aifarina oan ida hau la manan hau ba lakon tempu fali ba buat ne’e.

“Ba husu Ramalho, ninia avo hodi bainhira mak sai liurai ukun rai ne’e, hau mak liurai oan maibe ohin loron ita iha Republika Demokratiku” Tilman hatan jornalita CJITL.

Tuir Ramalho, APMT la'os foin mak hari'i maibe ida ne'e transformasaun husi istoria, tamba uluk KOTA hahu ho naran APMT.

Iha Lista Comisaun Nasional dos Eleisoens - CNE ne'ebe CJITL hetan hatudu katak APMT okupa numero 24 husi partidu 25 ne'ebe legal ona atu kompete iha eleisaun legislativa tinan ida ne'e.

Akompanya intervista kompletu ne'ebe redasaun CJITL sei hatun entre intervista ho Manuel Tilman no Pedro Ramalho, iha artigu rua tuir mai. (CJITL)