CJITL Exlusivu, Molok hau mai Kuala Lumpur atu halo investigasaun ou peskiza jornalismu nian konaba trabalhador estranjeiru ou migrant worker iha sidade ne'e, hau hetan surat tahan oan ida hakerek endereso, 62 JALAN AMPANG HILIR 55000 KUALA LUMPUR, MALAYSIA.

Bainhira to'o iha sidade Kuala Lumpur iha loron 24 Junho, Sexta feira loraik liu ba, buat ne'ebe la'o hadulas hau nia kakutak mak oinsa bele ba hasoru reprezentante ofisial estado Timor Leste nian iha nasaun ne'e hodi hato'o hau nia karta dezignasaun “designation letter” husi “SEAPA  (South East Asia Press Alliance) ne'ebe hau simu iha Jakarta, Indonesia loron 21 Junho 2011.

Designation letter ne'ebe atu entrega ba embaxada mak konaba hau nia prezensa durante semana 3 iha sidade ne'e atu halo peskiza ou investigasaun konaba oinsa trabalhador sira husi nasaun seluk tama mai halo servisu iha Malaysia.

Taxista: Where are you going sir?
Hau: Get me to Jalan Ampang Hilir 62!
Taxista: Ohhh....Diplomat area!

Iha Malaysia, embaxada hotu – hotu lokaliza iha area ida ho naran Jalan Ampang Hilir, no Timor Leste nian iha numero 62.

Bainhira to'o iha numero 62, hau hare kedan bandeira Timor nian no mos simbolu RDTL iha portaun inklui naran Republika Demokratika Timor Leste.

Iha Dili, Kuando hau hare ida ne'e hau ladun hakfodak, maibe iha Malaysia, maske besik hela iha Timor maibe kuando ita tama iha ita nia area embaxada ita senti hanesan ita iha hela Timor tanba ambiente simples ne'ebe iha embaxada ne'e refleta fila fali oinsa Timor nasaun ne'ebe sei foun no dezenvolve an hela.

Husi deit odan matan portaun embaxada nian, ita bele ona distinge oinsa kondisaun Timor Leste agora.

Hafoin hau dere tiha gate bell iha embaxada nian, Maun ida hakat mai atu loke odan matan, hau senti kedan hamnasa ema Timor nian ne'ebe murak no hakraik an.

Natercio (Timor Oan ida iha Embaxada): Boatarde Maun, Atu hasoru Maun Vanio kah?
Hau: Sim, Maun.
Natercio: Hein oitoan lai!

Hau hakfodak tebes bainhira Maun Natercio rasik hatene ona se mak hau atu hasoru, tanba los duni katak, iha hau nia objektivu ba embaxada ne'e atu hasoru duni Sr. Vanio, Terseiro Sekretariu iha Embaxada RDTL nian iha Malaysia.

Hafoin tama tiha ba laran no tur hein minutu 4 resin, teki tekir mosu mai, diplomata foinsa'e Timor oan ida ho naran Vanio Florival Ximenes de Jesus.

Hospitalidade Timor oan  liu – liu diplomata ne'ebe enkaregado iha Malaysia, hatudu duni imajen estado no povu nasaun ne'e.

Vanio de Jesus, iha hasoru malu ne'e kaer metin duni prinsipiu solidaridade ne'ebe Timor oan iha.

Vanio: Agora hela iha ne'ebe?
Hau: Hau hela iha Apartemen ida iha Persiaran Titiwansa 1, 53200, Kuala Lumpur!
Vanio: Tanba sa la kontaktu hau antes, tanba bele mai hela iha hau rezidensia tanba iha maluk Timor oan ida ne'ebe atu remata nia estudu iha ne'e, mos oras ne'e hela ho hau iha ne'ebe!

Husi ezemplu konversa ida ne'e deit hatudu tiha ona oinsa, Timor oan ne'ebe hakarak ba Malaysia sei la hetan susar iha rai ne'eba.

Buat ida ne'ebe espesial liu iha Malaysia mak, oras ne'e ita nia sidadaun ne'ebe hakarak ba ferias ou halimar loron balun iha Malaysia, la presiza taka viza iha embaxada Malaysia maibe bele mai taka deit iha Aeroportu Internasional Kuala Lumpur.

Labele hakfodak mos, tanba iha Aeroportu Malaysia, ita sei hetan Visa on Arrival ho gratuita alias la selu, liu – liu ba viazen badak hanesan loron 30 nian.

Vanio hatudu duni nia kualidade diplomata husi, nia performancia ne'ebe hatudu durante konversa ne'e.

“Foin lalais ne'e ami konsege lori emprezariu lubuk ida husi Malaka, Malaysia n'eebe atu ba investe iha ita nia rain” Vanio hateten.

“Timor oan barak mos mak servisu iha Malaysia, ami sempre atende sira iha ne'e, no tau matan ba sira, kuando sira mai husu tulun ou trata lisensa trabalho nian ruma” nia hatutan hodi remata.

Husi konversa ne'e, hatudu oinsa Kualidade embaxada ne'e nian iha Malaysia, hakfodak liu tan, bainhira hau temi dehan katak hau servisu ba CJITL, Terseiro Sekretariu ne'e haktuir katak iha Malaysia sira sempre akompanya noticia konaba Timor nian husi CJITL online. (CJITL Malaysia/Gil da Silva)