CJITL Exlusivu, Programa Dezenvolvimentu Dezentralizadu (PDD) nudar politika kuatru governu konstitusional ne’ebe durante ne’e aplika ona iha teritoriu Timor-Leste tomak.
Husi distritu 13 ne’ebe hetan projeitu PDD, rezultadu final hatudu katak projeitu PDD iha distritu balun hetan ona 100% maibe distritu balun mos seidauk to’o iha 100%, Iha biban ne’e, Centru Jornalista Investigativu Timor Leste (CJITL) koko lori  leitores hodi bele hatene konaba projeitu PDD iha distritu Bobonaro,  mai ita hamutuk deit dada lia murak ida husi jornalista CJITL Domingos da Silva ho Administrador Bobonaro Via telephone kuarta22/6.
 

CJITL: Prosesu implementasaun Programa PDD iha Distritu Bobonaro la’o oinsa?
DM: Prosesu PDD iha Distritu Bobonaro oras ne’e dadaun halo ona prosesu avaliasaun sen pursentu ba kompania ne’ebe mak hatama ona nia profil ba Komisaun Dezenvolvimentu Distritu-KDD ne’ebe mak iha 60 kompania. Depois ami halo avaliasaun dokumentus sira ne’e depois KDD sei sei ba sira nia edifisio hodi hare’e kondisaun hodi hare’e ekipamentus.

CJITL: Programa PDD Iha Distritu Bobonaro prioridade liu ba  area saida ?
DM: PDD iha Distritu Bobonaro Prioridade liu iha area irigasaun, depois ba iha konstrusaun ba postu imigrasaun  iha Fronteira nian ida,  konstrusaun  ba labarik sira nianida, depois konstrusaun Edukasaun Eskola  Sekundaria Dom Martinho Maliana, Saneamentu ba eskola Vokasional no seluk tan.

CJITL: Oinsa ho rezultadu Monitorizasaun  konaba implementasaun PDD ?
DM: Ami seidauk halo implementasaun atu halo para ami husi KDD  hein direktor Nasional atu mai halo kategoria  ba kampania ne’ebe maka KDD ba  halo berifikasaun  entervista  ho kompania  sira atu bele fo kategoria klasifikasaun ba ABC no D.
 
CJITL: Benefisiu PDD iha Distritu Bobonaro Rasik saida?

DM: Benefisiu ba komunidade hanesan irigasaun  ne’ebe mak atu  halo iha sub distritu Bobonaro  ne’e husi suku  Lourba  ne’e ninian ,ne’e benefisiu ba agrikultor  sira ne’ebe mak halo natar, depois benefisiariu ba Kazerna Polisia Imigrasaun tanba durante ne’e Imigrasaun la iha Kazerna.
 
CJITL:  Vantazen husin PDD ne’e saida?
DM: Hau hanoin vantazen  ba PDD n’ee bele halo dezenvolimentu ne’ebe susentavel atu nune’e ema hotu simu katak dezenvolimentu ne’e iha area teritoria tomak  e povo  mos hatene  katak governu bele hahu  kuda dezenvolimentu liu-liu dezenvolimentu infrastrutura ho seluk tan.

CJITL: Oinsa ita boot nia hanoin konaba Progama PDD ne’e ?
DM: Programa PDD hanesan programa Dezenvolvimentu Desentralizadu,  ne’e lalika para deit  iha ne’e, hau hanoin tenki ba oin.(Domingos da Silva/CJITL)