CJITL Exlusivu, Domingos Colo, Jovem ida mai husi Distritu Oecusse ho tinan 21, maske foin eskola pre sekundaria, terceira klase, maibe loron ida bele halo osan $35 iha kapital Dili ho negosiu ki'ik.

Iha nia fa'an fatin iha Palacio do Governu, Domingos ne'ebe loron - loron dudu karosa roda tolu ne'e haktuir ba CJITL online, Sabdu semana kotuk (7/5) katak dader nia ba eskola hafoin sai eskola mak nia kontinua halo negosiu fa'an sasan iha dalan ninin.

“Hau iha Dili tinan tolu ona, hau mai fofoun iha Dili hasoru kolega ida ba servisu iha projeitu ida, no kompania selu hau fulan ida $70, iha ne'eba hau servisu fulan rua, osan hau rai diak deit, kuando projeitu remata ona hau nia osan ne'e hau uja ba sosa gerobak ida, ho sasan hanesan sigaru, minuman no makanan ringan hodi fa'an iha dalan ninin” Ameu Colo konta tuir nia istoria.

“Hau fahe tempu, oras ba escola nian hau ba escola ,oras sai escola hau fila ba uma han meudia nian depois dudu hau nia gerobak  mai faanciha ne'e, tempo ezame hau la mai faan ida, hau estuda ba ezame depois  remata mak hau mai fa'an fali” Nia haktuir tan.

“Hau iha Dili, hela iha kos ida iha Tuana laran, fulan ida hau selu $20, osan ne'e mai husi hau nia negosiu tiga roda, tanba agora loron – loron hau hetan minimal $15 no maximal $35, depende ba sorte” Ameu Confesa.

Ameu mos haktuir katak osan nebe nia hetan loro-loron ne'e  uza hodi rezolve nia nesasidade loro-loron nian no selu escola no restu nia rai diak.

“Hau fa'an iha nee to tuku 7.00 kalan mak hau ba uma haris no han  depois prepara materia  para aban ba escola” Ameu konta tuir nia aktividade loron – loron.

“Difikuldade ne'ebe hau hasoru mak, dalaruma ema balun lanu mak mai foti ami nia sasan no la selu, wainhira ami haruka selu sira ameasa fali ami, Ami atu telefoni  policia mos  ami tauk tamba ita loro-loron mai fa'an iha ne'e, kuando ema mai baku fali ita iha ne'e entaun la livre ona atu fa'an iha ne'e tanba nee mak ami pasiensia deit maski ami lakon” Ameu hateten hodi remata intervista ne'e. (CJITL Internships)