Suai flash, Komunidade Suku Mata-Hui, Aldeia Iraler Sub-Distritu Watulari, Distritu Viqueque husu ba governu liu-liu Sekretáriu Estadu Siguransa atu tau postu PNTL permanente ida iha Aldeia Iraler atu nune’e bele fo siguransa ba komunidade sira bainhira mosu konflitu ruma iha aldeia ne’e.

Komunidade Aldeia Iraler, Martino da Costa husu ba governu atu tau postu PNTL permanente ida iha Aldeia Iraler, atu nune’e bele fo siguransa ba komunidade sira tanba durante ne’e sempre mosu konflitu barak iha Aldeia ida ne’e.

“Ami husu ba governu liu-liu Sekretáriu Estadu Siguransa atu bele monta postu PNTL permanente ida iha Aldeia Iraler, atu nune’e bele fo siguransa ba komunidade sira bainhira mosu konfilitu ruma iha fatin ne’e” dehan Martino, sabdu semana kotuk.

Nian hatutan katak governu liu-liu Sekretariu Estadu Siguransa tenke tau lalais postu PNTL permanente ida iha suku ne’e atu nune bele asegura seguransa molok tama ba iha eleisaun jeral 2012.

Hatan ba kestaun ne’e Sekretariu Estadu Siguransa-SES, Fransisco Guterres hateten katak governu liu husi sekretáriu Estadu Siguransa agora dadaun iha ona planu atu monta postu PNTL iha área ne’ebe do’ok husi postu Distritu, atu nune’e bele fo siguransa ba komunidade sira.

“Agora dadaun Sekretáriu Estadu Siguransa iha ona palnu atu monta postu provizóriu iha área ne’ebe do’ok husi postu PNTL Sub-Distritu sira atu nune’e bele fo siguransa ba komunidade sira ne’ebé iha área remota sira”dehan Guterres.

Agora dadaun ne’e governu liu husi SES iha ona planu atu tau postu permanente iha suku hotu no aldeia sira ne’ebé sempre mosu konflitu maibe Sekretáriu Estadu Siguransa susar ba rai atu bele harii postu PNTL nian. (Domingos da Silva/CJITL)